Presidentja e vendit, Vjosa Osmani ka kujtuar kolonelin Ahmet Krasniqi, në 26 vjetorin e vrasjes së tij.
Osmani ka thënë se sot kujtojmë me respekt atdhetarin, simbolin e guximit dhe sakrificës, komandantin e parë të Forcave të Armatosura të Kosovës, njëherësh ministër i Mbrojtjes i Kosovës.
Osmani përmes një postimi në “Facebook” ka shkruar se zbardhja e vrasjes së Ahmet Krasniqi është obligim dhe vrasja e tij u bë në mënyrë të pabesë.
“Ai u vra në mënyrë të pabesë dhe ishte viktimë e një akti të mjerë që u përpoq ta godasë përpjekjen për lirinë e Kosovës. Kolonelin e vranë, por jo ëndrrën për Kosovën e lirë dhe trashëgiminë e tij, ndaj zbardhja e vrasjes së tij është obligim i yni”, shkroi Osmani.
Osmani tha se Krasniqi ka qenë vizionar dhe udhëheqës ushtarak që ka besuar thellë lirinë e Kosovës.
“Në 26 vjetorin e vrasjes, me respekt e kujtojmë atdhetarin, simbolin e guximit dhe sakrificës, kolonelin Ahmet Krasniqi, komandanti i parë i Forcave të Armatosura të Kosovës, njëherësh ministër i Mbrojtjes i Kosovës. Sot nderojmë jo vetëm njeriun, por vlerat që ai mishëroi: trimërinë, qëndrueshmërinë dhe angazhimin e palëkundur për lirinë e Kosovës”, ka shkruar Osmani.