Prokuroria Themelore në Prizren ka ngritur aktakuzë ndaj S.H., shtetas i Republikës së Shqipërisë, i cili gjendet në paraburgim për vrasje të rëndë, pasi u ekstradua nga Mbretëria e Bashkuar më 30 gusht të këtij viti.
“Prokuroria Themelore në Prizren, Departamenti i Krimeve të Rënda, ka ngritur aktakuzë kundër të pandehurit S.H., shtetas i Republikës së Shqipërisë, i cili gjendet në paraburgim nga data 30.08.2024, pas ekstradimit nga Mbretëria e Bashkuar, për shkak të dyshimit të bazuar mirë, se në bashkëkryerje ka kryer veprën penale “Vrasja e rëndë” nga neni 179 par. 1 nën par. 1.4 lidhur me nenin 31 të KP-së”, thuhet në njoftim.
Rasti kishte ndodhur më 4 qershor 2013 në Prizren, ku S.H., në bashkëpunim me S.K., tashmë i dënuar, akuzohet se privuan nga jeta mizorisht këngëtaren I.K., për shkak të mospajtimeve mbi profesionin e saj.
Viktima u godit për vdekje me thikë, siç vërtetohet nga autopsia e datës 5 qershor 2013.
“Sipas aktakuzës, me datë 04.06.2013 në periudhën kohore prej orës 03:23min dhe 06:47min, në Prizren, me dashje privon nga jeta në mënyrë mizore dhe tinzare nga motivet e ulëta së bashku me tani të dënuarin S.K., – viktimën I.K., në atë mënyrë që së bashku me S.K., nga Shkodra-Republika e Shqipërisë, vjen për të vizituar I.K., e cila ishte duke punuar si këngëtare-valltare në Mitrovicë në lokalin “Sh.”, pronë e M.S., me ç’rast takohen në Prizren, ku qëndrojnë në shtëpinë e F.R., ku ajo ka banuar më herët.
Pasi që familja nuk është pajtuar lidhur me punën e saj si valltare dhe këngëtare në lokalet e natës, dhe pasi e njëjta nuk është pajtuar të kthehet në shtëpi, papritmas i pandehuri S.H., me thikë së bashku me S.K., fillojnë të godasin I.K., në pjesë të ndryshme të trupit duke i shkaktuar plagë prerëse – shpuese, me ç’rast ka ardhur deri te vdekja e dhunshme si pasojë e gjakderdhjes masive të shkaktuar nga veprimi mekanik i mjetit të fortë dhe të prehtë, e që është konstatuar sipas raportit të autopsisë së kryer me datë 05.06.2013”, thuhet në njoftimin e Prokurorisë.
Prokuroria kërkon nga Gjykata që i akuzuari të shpallet fajtor dhe të dënohet sipas ligjit.