Kuvendi i Kosovës të mërkurën e 22 qershorit ka planifikuar t’i mbajë dy seanca plenare. E para që nis në ora 10:00, ku do t’i ketë pesë pika në rend të ditës, kurse e dyta që fillon një orë më vonë, planifikohet t’i ketë 20 pika të tjera.
Njëra nga pikat për të cilat ka pasur diskutime të gjata e po ashtu edhe reagime jashtë Kuvendit të Kosovës, e cila ka shkaktuar protesta, është ajo për shqyrtimin e parë të Projektligjit që mundëson tërheqjen deri 30 për qind të mjeteve nga Trusti.
Tërheqja deri në 30% e kursimeve pensionale është duke u kërkuar që një kohë nga partitë opozitare, por kundër kësaj iniciative ka dalë partia në pushtet Lëvizja Vetëvendosje, e cila ka bërë të ditur se do të votojnë kundër.
Iniciatorë të kërkesës për tërheqjen e kursimeve pensionale apo siç njihet ndryshe Trustit, ka qenë Partia Demokratike e Kosovës, me arsyetimin se kriza ekonomike ka ndikuar në rritjen e çmimeve kështu duke e bërë jetën e qytetarëve më të vështirë.
Në vitin 2020, kur ishte kryeministër Avdullah Hoti i Lidhjes Demokratike të Kosovës, ishte lejuar tërheqja e 10% të kursimeve pensionale, me arsyetimin se pandemia Covid-19, ka shkaktuar krizë financiare te qytetarët.