Të premten e 24 qershorit, do të vazhdojë dita e dytë e Samitit të Bashkimit Evropian(BE) me Ballkanin Perëndimor.
Sipas agjendës, duke filluar në ora 09:00 pritet që pjesëmarrësit të arrijnë, derisa një orë më pas do të fillojë një sesion pune.
Më pas është e planifikuar një konferencë e përbashkët për shtyp nga Presidenti i Këshillit Evropian, Charles Michel, Presidentja e Komisionit Evropian, Ursula von der Leyen dhe Presidenti i Francës, Emmanuel Macron.
Udhëheqësit do të zhvillojnë një diskutim strategjik se si të përforcojnë marrëdhëniet e BE-së me partnerët e tyre, duke përfshirë mënyrën se si të nxitet dialogu politik dhe të forcohet siguria, stabiliteti dhe prosperiteti i kontinentit evropian.
Më vonë temë diskutimi do të jetë Ukraina.
Udhëheqësit e BE-së do të diskutojnë zhvillimet e fundit në lidhje me luftën e Rusisë kundër Ukrainës, përfshirë ndikimin e saj në krizën globale të sigurisë ushqimore, si dhe mbështetjen ushtarake, politike dhe humanitare që planifikohet t’i jepet Ukrainës.
Gjatë ditës së djeshme, zëdhënësi i Këshillit të Evropës, Barend Leyts ka publikuar përfundimet e nxjerra pas përfundimit të samitit, ku i bëhet thirrje Prishtinës dhe Beogradit që përmes dialogut t’i normalizojnë marrëdhëniet mes tyre.
Conclusions on #WesternBalkans approved at #EUCO pic.twitter.com/iPJn174fy8
— Barend Leyts (@BarendLeyts) June 23, 2022
“Këshilli Evropian ripohon urgjencën e arritjes së përparimit të prekshëm në zgjidhjen e mosmarrëveshjeve të pazgjidhura dypalëshe dhe rajonale, veçanërisht në Dialogun Beograd-Prishtinë për normalizimin e marrëdhënieve ndërmjet Serbisë dhe Kosovës”, shkruhet në pikën e 19-të.
Në këto konkluzione nuk përmendet liberalizimi i vizave për Kosovën, ani pse në pikën e parë thuhet se Bashkimi Evropian shpreh angazhimin e tij të plotë dhe të qartë për perspektiven e anëtarësimit të Ballkanit Perëndimor në Bashkimin Evropian.
Ndryshe, liderët e 27 vendeve të Bashkimit Evropian, këtë samit në Bruksel e kanë filluar të enjten e 23 qershorit, të paraprirë nga një takim i krerëve të shteteve dhe qeverive të BE-së dhe Ballkanit Perëndimor.