Policia e Kosovës ka njoftuar se një person është plagosur gjatë një grabitje të armatosur që ka ndodhur në lagjen “Veternik” në Prishtinë.
Zëdhënësja e Policisë për Rajonin e Prishtinë, Flora Ahemeti, ka konfirmuar rastin për Dukagjinin, duke theksuar se fillimisht u raportua për të shtëna me armë në lagjen Veternik të Prishtinës, ku një person ka mbetur i plagosur.
Sipas të dhënave të deritanishme, dyshohet se grabitja e armatosur ka ndodhur ndaj pjesëtarëve që po siguronin një furgon që transportonte para.
Personi i lënduar është dërguar menjëherë për tretman mjekësor.
Hetuesit policorë, në koordinim me Prokurorinë, janë duke ndërmarrë të gjitha masat e nevojshme për identifikimin dhe arrestimin e të dyshuarve, si dhe për zbardhjen e plotë të rrethanave të rastit.