Avokati Shkëlzen Sopjani ka deklaruar se zgjidhja e ngërçit politik për konstituimin e Kuvendit nuk po shihet si e mundur përmes vullnetit politik të palëve, duke theksuar se të gjitha subjektet janë të barrikaduara në pozicionet e tyre.
“Përveç një doze më të madhe fleksibiliteti që po e tregon PDK, nuk shoh ndonjë vullnet serioz për një marrëveshje gjithëpërfshirëse. Pa këtë vullnet, procesi i ndërmjetësimit i iniciuar nga Presidentja është i destinuar të dështojë,” tha Sopjani në emisionin Five.
Sipas tij, Kushtetuta e Kosovës e kufizon Presidenten vetëm në rolin e ndërmjetësueses, pa kompetencë për të ndërhyrë në mënyrë vendimmarrëse. Në rast të dështimit të ndërmjetësimit, ai theksoi se Presidentja ka mundësi t’i drejtohet Gjykatës Kushtetuese.
“Në këtë rast, arbitri i vetëm kushtetues është Gjykata Kushtetuese. Por Kushtetuta nuk jep zgjidhje të drejtpërdrejtë për situata të tilla. Prandaj, Gjykata duhet të tregojë guxim dhe kreativitet për të mbushur këtë zbrazëti juridike që lidhet me konstituimin e Kuvendit,” tha Sopjani.