Nga palestrat e vogla të Gjakovës, po zhvillohet një sport jo shumë i njohur në Kosovë.
Jiu-Jitsu brazilian po praktikohet me të madhe në qytetin buzë Erenikut.
Gembi Juniku, është kthyer në një emër që po vendos Kosovën në hartën e Brazilian Jiu-Jitsu.
Me një përkushtim të pakrahasueshëm, ai po ndërton një karrierë të jashtëzakonshme për t’u marrë shembull.
Karriera e Junikut nisi mbi një dekadë më parë, por shumë shpejt ai e gjeti veten të përkushtuar plotësisht ndaj Brazilian Jiu-Jitsu.
Në vitin 2022 mori belen e kaltër, ndërsa në nëntor të vitit 2024 arriti një tjetër kulm – promovimin në belen e purpurt në kuadër të turneut prestigjioz “Abu Dhabi Jiu Jitsu Pro (AJP Tour)”.
Pjesëmarrja e tij në turne në vende si Italia, Turqia, Mali i Zi, Serbia, Kroacia dhe Shqipëria i ka sjellë jo vetëm përvojë ndërkombëtare, por edhe renditje të larta.
Aktualisht, Gembi renditet i katërti në kategorinë “Men’s Master Professional Grappling” për vitin 2024–2025, ndërsa ka mbajtur edhe pozitën e dytë në “Amateur Blue NO-GI” për sezonin e kaluar.
Një nga momentet më simbolike të karrierës së tij ndodhi në Beograd, ku pas një performance të shkëlqyer, ai e ngriti flamurin e Kosovës në mesin e publikut serb.
Përveç garave si sportist, Juniku është aktiv edhe si trajner në fushën e MMA dhe fitness. Ai është pjesë e ekipeve “Tirana MMA Center” dhe “Fight Club 07”.