Historiani Jusuf Buxhovi, i ftuar në emisionin Five, ka deklaruar se historia e shtetësisë serbe është e ndërtuar mbi mite të fabrikuara që nga ndikimi rus në Ballkan.
“Duhet të themi fillimisht se këtu është fjala për një mit. Serbia si shtet është ndërtuar me mite, historia e Serbisë nuk është një histori e një etnie të konstituuar historikisht,” theksoi Buxhovi.
Ai argumentoi se Rusia ka luajtur rol vendimtar në krijimin e identitetit politik dhe historik serb: “Prej fundit të shekullit 18 dhe fillimit të shekullit 19, Rusia ka qenë ajo që, kur mori përsipër konferencën e paqes dhe në konferencat tjera përkujdesjen për popullatën ortodokse dhe Kishën Ortodokse në Ballkan, gjithmonë synonte, së paku, serbët, malazezët dhe bullgarët t’i krijojë si shtete satelite.”
Buxhovi theksoi edhe bashkëpunimin e kishës ortodokse serbe me atë ruse për të legjitimuar pretendimet territoriale përmes miteve: “Kisha Ortodokse Serbe me Kishën Ortodokse Ruse dhe në përgjithësi me ato elementet hegjemoniste që kishte futur Rusia në Ballkan, projektuan edhe aspektin historik përmes mitit. Dhe aspekti historik ishte që t’i krijohej Serbisë një mit historik dhe ajo ishte lufta, Kosova, shteti mesjetar dhe beteja e Kosovës.” Sipas tij, edhe përzgjedhja e datës së Vidovdanit nuk është rastësi: “U gjet dita e përshtatshme, dita e Vidovdanit. Është Shën Vidi. Shën Vidi është një shenjtni pagane, mandej e kanë marrë krishterimi dhe secili në format e ndryshme e kanë përdorur.”