“Edhe paaak, djali jem është tarzan…”.
Me këto fjalë, Ibadete Hasani po e inkurajon të birin 10-vjeçar, Elvisin t’i hap sytë, pas thuajse tre javësh që nuk mund ta bënte këtë.
Tek para dy ditësh, i biri ka dalë nga reparti i intensives pasi ishte goditur rëndë nga një veturë në Bresje të Fushë-Kosovës derisa po e kalonte rrugën me biçikletë.
Gjendja e tij mbetet ende e rëndë, me vështirësi në aftësi motorike e palëvizshmëri në anën e majtë të tij.
“Djali s’dinë sen. Boll i folum, sytë i mban qel. Boll i folim Elvis se mjekët më kanë thënë me i fol. Ja kapi duart, mos po mi shtrëngon a diçka po jo hiç, vec shpurth. Këtë dorë dhe këtë këmbë, e këto të tjerat nuk i lëviz hiç. Zor se po e ndërroj vet, edhe i madh. Po ç’ka me bo, zoti e ka në n’dorë”, ka thënë Ibadete Hasani – Nëna e 10-vjeçarit.
Përmirësimi i gjendjes së të birit nuk mbetet halli i vetëm i saj.
Zyrtarë të Policisë së Kosovës kishin vizituar Ibadete Hasanin ditën e aksidentit duke thënë se vozitësi ishte arrestuar por më pas ajo kishte dëgjuar ndryshe.
E pavarësisht kësaj, familja nga komuniteti ashkali nuk ka pranuar asnjë informatë më pas nga organet e rendit edhe pse të njëjtit sipas saj, kishin ardhur përsëri në Klinikë.
“Më thanë që kanë ardh policia e Fushë Kosovës po kanë bisedu me mjek e nuk e di. Unë nuk i kam pa, nalt s’kanë ardh. Mjekët siç i kam dëgju, kanë thënë që nuk e kanë zënë atë person. E ka godit djalin dhe ka ik”, ka thënë Ibadete Hasani – Nëna e 10-vjeçarit.
Për këtë, familja Hasani ka vendosur të ndjek rrugët ligjore.
“Me gjykatë po, vjehërri bile po shkon mas këtyre punëve se burrin e kam të verbër, nuk sheh. Jemi tu shku me gjykatë masi ai vet nuk na u lajmëru”, ka thënë Ibadete Hasani – Nëna e 10-vjeçarit.
Në raportin 24-orësh të Policisë së Kosovës për ditën e aksidentit, 10 gusht, nuk potencohet se djali është i mitur dhe as arrestimi i shoferit.
Njëjtë, sot Policia tha për televizionin se vetëm e ka intervistuar të dyshuarin.
AKSIDENT TRAFIKU ME LËNDIME TRUPORE
Rr. Fushë Kosovë-Prishtinë / 10.08.2025 – 10:10. Ka ndodhë një aksident trafiku me lëndime, ku të përfshira kanë qenë një automjet me targa vendore me drejtues mashkull kosovar, dhe një biçikletë në lëvizje. Si pasojë e aksidentit drejtuesi i biçikletës mashkull kosovar ka marrë lëndime të rënda trupore dhe është duke marrë tretman mjekësor në QKUK. Rasti është duke u hetuar.
Lidhur me aksidentin personi i dyshuar është intervistuar nga ana e policisë dhe lënda është përcjellë në prokurori për veprime të mëtejme, ku dhe mund të adresoni pyetjet tuaja për detaje. – Policia e Kosovës
Por, Prokuroria deklaron diçka tjetër.
“Rasti nuk është pranuar ende në Prokurori”, ka deklaruar Kaltrina Shala, zëdhënëse e Prokurorisë Themelore në Prishtinë.
“Ky rast nuk është pranuar ende në Prokurori” – Kaltrina Shala, Prokuroria Themelore e Prishtinës
Sipas raportimeve të mediave për aksidentin, personi që po voziste veturën dyshohet të jetë A.M, 50-vjeçar, por kjo nuk është konfirmuar nga asnjëra palë.