Analistja Fatime Hajdari ka komentuar në emisionin Debat Plus situatën politike në vend dhe vendimin që pritet të marrë presidentja Osmani për mandatarin e radhës ose dërgimin e vendit në zgjedhje.
Sipas saj, pas zhvillimeve të fundit nuk ka mbetur asnjë alternativë tjetër përveç mbajtjes së zgjedhjeve të reja.
“Kjo, pak a shumë, ka qenë vullneti i të gjitha partive me këto këmbëngulje në taborët e tyre. Konsideroj që të mërkurën, më 5 nëntor, do të përcaktohet përfundimisht edhe data për zgjedhjet e reja, për zgjedhjet e parakohshme, dhe pastaj mbetet të shihet epilogu se si do të dalin secila prej partive politike. Konsideroj se një situatë e tillë do t’i konvenonte më së shumti subjektit që tani është subjekti më i madh politik”, ka deklaruar Hajdari.
Ajo ka shtuar se në rast të zgjedhjeve, Lëvizja Vetëvendosje do të hyjë më e përgatitur se rivalët e saj politikë.
“Lëvizja Vetëvendosje shkon më e konsoliduar se sa subjektet e tjera politike”, ka përfunduar Hajdari.