Testimi i raketës bërthamore ruse Burevestnik po konsiderohet nga NATO si një kërcënim i madh strategjik, për shkak të rrezes së saj praktikisht të pakufizuar dhe aftësisë për të kryer manovra të ndërlikuara në fluturim.
Sipas një dokumenti të klasifikuar të Aleancës, të siguruar nga gazeta gjermane Die Welt, kapacitetet e kësaj arme do të thellonin më tej sfidat aktuale të sigurisë.
Raketa është projektuar të përshkojë distanca shumë të gjata, me shpejtësi deri në 900 km/h, dhe mund të lëshohet nga platforma të lëvizshme. Falë teknologjisë së saj të avancuar, ajo ka aftësinë të shmangë sistemet e mbrojtjes ajrore të NATO-s, duke e bërë veçanërisht të vështirë për t’u neutralizuar.
Reaktori bërthamor i integruar i jep raketës një rreze veprimi teorikisht të pakufizuar, duke i mundësuar të qëndrojë në ajër për periudha të gjata, të ndryshojë drejtimin disa herë dhe të sulmojë objektiva nga çdo pozicion. Dokumenti i NATO-s paralajmëron se një aftësi e tillë do t’i ekspozonte vendet anëtare ndaj një rreziku të shtuar.
Zbulimi thekson gjithashtu se Aleanca ka boshllëqe të rëndësishme në mbrojtjen ndaj raketave me rreze të mesme dhe të gjatë, sidomos atyre me ngarkesë bërthamore. Megjithatë, disa ekspertë mbeten skeptikë lidhur me funksionalitetin real të Burevestnikut, duke ngritur dyshime nëse reaktori bërthamor mund të operojë ashtu siç pret Moska.