Sot janë bërë dy vjet nga vrasja e Liridona Ademajt, ndërsa familja e saj vazhdon të kërkojë që kriminelët të marrin dënimin e merituar.
Vëllai i saj, Liridoni, përmes një postimi në Facebook, ka shprehur dhimbjen dhe mallin për motrën, duke theksuar se familja nuk mund të pajtohet me mungesën e saj dhe kërkon drejtësi, njofton Dukagjini.
“Sot bëhen 2 vite që nga ikja jote Motër. Malli për ty shtohet çdo ditë,mungesa jote vërehet në çdo kohë. Këto 2 vite nuk ishin të lehta për ne si familje nuk mundemi asesi të pajtohemi me faktin qe ti nuk je më ne mesin tonë. Na ka marrë malli shumë për prezencën tënde asgjë më nuk është e njëjtë. Vitet po ecin shpejtë e ne akoma po ballafaqohemi me kriminelët të cilët padrejtësisht të morën nga ne. Do të luftojmë deri në frymën e fundit duke kërkuar drejtësi për ty Motër. Kriminelët duhet të marrin dënimin e merituar. Të kujtojmë me mall e shumë dashuri Familja Ademaj dhe djemt Diar&Dion”, ka shkruar ai në Facebook.
Kujtojmë se Liridona Ademaj u vra më 29 nëntor të vitit 2023 në Prishtinë, teksa bashkë me dy fëmijët dhe burrin Naim Murseli po ktheheshin në shtëpi pasi kishin ngrënë darkë në një restorant. Fillimisht u raportua për vrasje si pasojë e grabitjes, e më pas Prokuroria bëri të ditur se gjithçka ishte inskenim i Murselit, bashkëshortit të viktimës.
Ajo dyshohet se u vra nga Granit Plava në sy të fëmijëve.
Veç Murselit dhe Plavës, i arrestuar është edhe Kushtrim Kokalla, që dyshohet se ka qenë në dijeni për vrasjen e Liridonës teksa rasti ende nuk ka marrë epilog përfundimtar në gjykatë.