Spitali i Gjakovës “Isa Grezda” ka reaguar pas vdekjes së një gruaje, ku sipas shqetësimit të ngritur nga bashkëjetuesi i saj dyshohet për trajtim të pandërgjegjshëm mjekësor.
Sipas njoftimit të spitalit, thuhet se pacientja M.R. që vdiq dje (e premte) ka qenë në gjendje komatoze (pa vetëdije) për më shumë se tre vjet dhe se gjatë gjithë kësaj periudhe është trajtuar në Kujdes Intensiv Qendror.
“Për tri vite me radhë, pacientja është trajtuar nga mjekët dhe infermierët e kujdesit intensiv, në përputhje të plotë me protokollet mjekësore të aplikueshme për raste të tilla”, thuhet në njoftim.
“Stafi mjekësor dhe infermierët kanë ofruar kujdes të pandërprerë dhe profesional, në përputhje me protokollet mjekësore për raste të tilla”.
Tutje, spitali theksoi se personi që ka bërë denoncimin nuk është familjar i pacientes, ndërsa deklaratat e tij i cilëson si tentativë të qëllimshme për të njollosur punën e stafit mjekësor.
Edhe pse vizitat në Kujdesin Intensiv operohen me rregulla strikte, siç njoftin Spitali i Gjakovës, familjarët e pacientes kanë qenë të pranishëm gjatë gjithë kohës që ajo ka qëndruar në spital.
“Nuk është detyrë e jona të hyjmë në çështje të brendshme familjare dhe askush nuk mund të përfitojë duke shpifur apo duke manipuluar opinionin me deklarata të pavërteta”.
Tutje, spitali ka bërë apel që organet kompetente si Inspektorati Shëndetësor, Policia dhe Prokuroria që të trajtojnë rastin me seriozitet dhe të mos lejojnë shpifje apo manipulime që dëmtojnë punën e punëtorëve shëndetësorë.
Vdes një grua në Gjakovë, nisin hetimet për trajtim të pandërgjegjshëm mjekësor