Kryeministri në detyrë, Albin Kurti, ka kujtuar sot njëvjetorin e sulmit terrorist ndaj akuaduktit të Ibër Lepencit në fshatin Varagë të Zubin Potokut, ngjarje që ai e cilëson si goditje të rëndë ndaj infrastrukturës kritike të Republikës së Kosovës.
Sipas Kurtit, më 28 nëntor të vitit të kaluar, rreth orës 19:00, akuadukti u bë shënjestër e një sulmi kinetik me eksploziv, i dyti i natyrës terroriste brenda dy vitesh pas sulmit paramilitar në Banjskë, dhe i pari që kishte në cak drejtpërdrejt infrastrukturën thelbësore të vendit.
Ai theksoi se dëmtimi i rëndë i pjesës fundore dhe i një balline të akuaduktit rrezikoi furnizimin me ujë për mijëra konsumatorë, përfshirë Termocentralin “Kosova B”, ndërsa objektivi i sulmit ishte “ulja për 60% e kapaciteteve prodhuese të energjisë elektrike dhe ndërprerja e furnizimit me ujë për zona të gjera të vendit”.
Kurti vlerësoi përgjigjen e menjëhershme dhe efikase të institucioneve, të cilat arritën të parandalojnë pasojat katastrofike të synuara nga aktorët e jashtëm, duke garantuar ftohjen e termoelektranave, funksionimin e energjisë elektrike dhe furnizimin me ujë të pijshëm. Ai theksoi se akuadukti u rindërtua brenda vetëm një muaji, duke u rikthyer në kapacitet të plotë operativ.
“Shteti dhe Republika triumfuan përsëri përballë grupeve ekstremiste dhe terroriste që marrin mbështetje nga Beogradi zyrtar dhe inspirim nga Rusia”, shkroi Kurti, duke krahasuar sulmin me ato që Rusia kryen ndaj rrjetit energjetik të Ukrainës.
Kreu i qeverisë në detyrë rikujtoi se gjatë bastisjeve në veri, të lidhura me këtë ngjarje, u konfiskuan armë, uniforma, pajisje dhe emblema ruse e serbe të strukturave të inteligjencës, ushtrisë dhe sigurisë — prova të cilat, sipas tij, dëshmojnë qartë përfshirjen e grupeve ekstremiste serbo-ruse me bazë në Serbi, që synojnë destabilizimin e Kosovës dhe krijimin e pasigurisë në rajon.
Në pritje të aktakuzës, një vit nga sulmi terrorist ndaj infrastrukturës kritike