Ish-pjesëtari i UÇK-së dhe shtetasi i Kosovës, Avni Qenaj, është dërguar në paraburgim për një muaj nga Gjykata në Beograd, pavarësisht – siç thotë mbrojtja – mungesës së çdo prove.
Lajmin e ka bërë të ditur avokati i tij, Xhevdet Smakiqi, i cili theksoi se familja Qenaj, në këto ditë festive kombëtare, po përballet me ankth dhe ndjehet e braktisur nga institucionet e Kosovës.
Sipas Smakiqit, familja po detyrohet të mbrojë vetë të drejtat ligjore dhe lirinë e lëvizjes së Avniut përmes angazhimit privat të avokatëve.
“Pafajësia e Avni Qenaj do të triumfojë, por çfarë kuptimi ka shteti i Kosovës kur dështon në secilën fushë? Liri për Avni Qenaj dhe gëzuar 28 Nëntorin në qelinë e Beogradit ku po mbahet i kidnapuar, në kundërshtim me konventat ndërkombëtare”, ka shkruar Smakiqi në Facebook.
Avni Qenaj, nga Romaja e Prizrenit, u arrestua para katër ditësh. Ai ka qenë pjesëtar i Brigadës 138 “Agim Ramadani” në Koshare, dhe dyshohet se arrestimi lidhet me faktin se i është gjetur kartela e anëtarësisë së veteranit të UÇK-së.
Ministria e Punëve të Brendshme të Serbisë njoftoi më 25 nëntor se ka arrestuar një ish-pjesëtar të UÇK-së, të identifikuar vetëm me inicialet A.Q.
Vitet e fundit, autoritetet serbe kanë arrestuar disa qytetarë të Kosovës, të cilët Beogradi i akuzon për krime lufte.