Komisioni Qendror i Zgjedhjeve ka miratuar sot rekomandimin e Sekretariatit të KQZ-së për zhvillimin e procedurave emergjente ekstreme për aktivitetet e prokurimit që lidhen me zgjedhjet e parakohshme, të cilat do të mbahen më 28 dhjetor 2025.
Ky vendim përfshin një sërë aktivitetesh të domosdoshme për organizimin e zgjedhjeve, duke përfshirë shtypjen e fletëvotimeve, broshurave dhe listave përfundimtare të votuesve, furnizimin me materiale për votim jashtë Kosovës, shërbimet postare, paketat dhe doracakët e trajnimit, planin e informimit dhe edukimit të votuesve, transportin e materialit zgjedhor, kabinat dhe format e votimit.
Furnizimin me vula dhe materiale administrative, distinktivët për stafin zgjedhor dhe vëzhguesit, lidhëset e sigurisë për kutitë e votimit, si dhe shërbimet teknike dhe të mirëmbajtjes për QKN, përfshirë kamerat dhe pajisjet e rrjetit.
Gjatë diskutimeve, përfaqësuesit e Lëvizjes Vetëvendosje ngritën shqetësimin se vonesat me dërgimin e zarfeve me fletëvotime dhe shpenzimi prej 3.6 milionë eurosh për transport mund të shmangeshin me një formë tjetër, por ky propozim nuk gjeti përkrahje.
Pika u miratua me 7 vota për dhe 4 kundër.
KQZ ende s’i kanë marrë paratë nga Qeveria për zgjedhjet e 28 dhjetorit