Parlamenti zviceran votoi të enjten për të lehtësuar kufizimet në eksportet e armëve, në një lëvizje që synon të mbështesë industrinë vendase të armëve pa kompromentuar neutralitetin tradicional të vendit.
Në të ardhmen, kompanitë zvicerane do të lejohen të eksportojnë armë në 25 vende perëndimore, ndërsa rregullat që kërkojnë pëlqimin për rieksportin e armëve zvicerane do të lehtësohen, shkruan Reuters, transmeton Dukagjini.
Aktualisht, Zvicra nuk lejon eksportet e armëve nëse vendi i destinacionit është i përfshirë në një konflikt të brendshëm ose ndërkombëtar, ose nëse shkel rëndë të drejtat e njeriut.
Eksporti i drejtpërdrejtë i armëve në Ukrainë do të mbetet i ndaluar sipas ndryshimeve në legjislacion.
Dhoma e sipërme e parlamentit mbështeti ndryshimet në Aktin e Materialeve të Luftës të Zvicrës me 31 vota pro dhe 12 kundër, pas miratimit nga dhoma e ulët të martën.
Vendimi erdhi pasi industria dhe politikanët ngritën shqetësime në lidhje me dëmin e shkaktuar në sektorin zviceran të armëve, i cili po humbiste porosi jashtë vendit për shkak të kufizimeve.
Këshilli Federal në pushtet do të vendosë se kur rregullat e reja do të hyjnë në fuqi.
Ndryshimet ligjore mund të përballen ende me një referendum.