Përpjekja e 18 emigrantëve për të arritur në bregdetin jugor të Kretës, mes detit të trazuar, përfundoi në tragjedi, pasi varka me të cilën po lundronin u mbush me ujë dhe u fundos.
Varka u gjet gjysmë e zhytur nga një anije mallrash me flamur turk, e cila dha alarmin dhe njoftoi autoritetet.
Menjëherë nisi një operacion i gjerë kërkim-shpëtimi nga Autoritetet Portuale të Kretës, të cilat mobilizuan mjete lundruese pavarësisht kushteve jashtëzakonisht të vështira të detit.
Sipas përditësimit të autoriteteve greke, dy anije të Rojës Bregdetare, një anije e Frontex, tre anije të tjera bregdetare, një helikopter Super Puma dhe një avion i Frontex u dërguan në vendngjarje për të kërkuar personat e zhdukur.
Ndërkohë, varka e emigrantëve ishte fundosur plotësisht. Dyshohet se 18 nga 20 emigrantët kanë humbur jetën, ndërsa dy persona të tjerë kanë arritur të shpëtojnë.