Liverpooli, Bayern Munich dhe Barcelona kanë regjistruar fitore të rëndësishme, duke forcuar pozitat e tyre për kualifikim në fazën tjetër të Champions League.
Liverpooli triumfoi 3:0 në udhëtim ndaj Marseille, me gola nga Dominik Szoboszlai (goditje e lirë), autogol i Facundo Medinës dhe Cody Gakpos.
Me këtë fitore, “Reds” ngjiten në vendin e katërt dhe janë shumë pranë kualifikimit direkt në 1/8 e finales.
Bayern Munich siguroi vendin mes tetë skuadrave më të mira duke mposhtur Royale Union Saint-Gilloise 2:0. Harry Kane ishte protagonist me dy gola, njëri nga loja dhe tjetri nga penalltia. Pavarësisht një kartoni të kuq, bavarezët kontrolluan pjesën e dytë dhe kualifikimi u sigurua një xhiro para fundit.
Barcelona fitoi 4:2 ndaj Slavia Prague në një ndeshje me shumë gola. Fermín Lopez shënoi dy herë, ndërsa Dani Olmo dhe Robert Lewandowski kontribuan me nga një gol.
Për vendasit shënoi Kusej dhe një autogol i Lewandowskit. Kjo fitore i mban katalanasit në lojë për kualifikim automatik para ndeshjes së fundit në shtëpi.
