Ministri i Jashtëm i Iranit tha të premten se bisedimet bërthamore me Shtetet e Bashkuara, të ndërmjetësuara nga Omani, kanë nisur me një “fillim të mirë” dhe do të vazhdojnë, deklarata që mund të zbusë shqetësimet se dështimi për të arritur një marrëveshje mund ta shtyjë Lindjen e Mesme më afër luftës.
Ministri i Jashtëm Abbas Araqchi, pas bisedimeve të mbajtura në kryeqytetin e Omanit, Muskat, ku morën pjesë edhe i dërguari special amerikan Steve Witkoff dhe Jared Kushner, dhëndri i presidentit amerikan Donald Trump, theksoi se “çdo dialog kërkon përmbajtje nga kërcënimet dhe presioni”.
“Teherani diskuton vetëm çështjen e tij bërthamore… Ne nuk diskutojmë asnjë çështje tjetër me SHBA-në,” tha Araqchi.
Ndërsa të dyja palët kanë sinjalizuar gatishmëri për të ringjallur diplomacinë mbi mosmarrëveshjen e gjatë bërthamore të Iranit me Perëndimin, Uashingtoni dëshiron që bisedimet të përfshijnë edhe programin balistik iranian, mbështetjen për grupet e armatosura në rajon dhe “trajtimin e qytetarëve të vet”, siç deklaroi të mërkurën Sekretari amerikan i Shtetit, Marco Rubio.
Një diplomat rajonal, i informuar nga Teherani mbi bisedimet dhe që foli për Reuters në kushte anonimiteti, tha se Irani këmbënguli në “të drejtën e tij për të pasuruar uranium” gjatë negociatave me SHBA-në, duke shtuar se aftësitë raketore të Iranit nuk u trajtuan në këto diskutime.
Ndërsa Irani përjashtoi kërkesën amerikane për ndalimin e plotë të pasurimit të uraniumit në territorin e tij, diplomati tha se Teherani tregoi gatishmëri për të diskutuar “nivelin dhe pastërtinë” e pasurimit ose zgjidhje alternative, përfshirë krijimin e një konsorciumi rajonal.
Në këmbim, Irani paraqiti disa kërkesa, përfshirë “heqjen efektive dhe të menjëhershme të sanksioneve, veçanërisht në sektorët bankar dhe të naftës, si dhe largimin e mjeteve ushtarake amerikane nga afërsia me Iranin”.
Zyrtarët iranianë kanë përjashtuar vazhdimisht përfshirjen e programit raketor – një nga arsenalet më të mëdha në Lindjen e Mesme – në tryezën e bisedimeve, duke kërkuar gjithashtu njohjen e së drejtës së Iranit për pasurimin e uraniumit.
Për Uashingtonin, kryerja e pasurimit të uraniumit brenda Iranit – një proces që mund të çojë drejt prodhimit të armëve bërthamore – përbën një vijë të kuqe. Teherani ka mohuar prej kohësh se synon militarizimin e programit të tij bërthamor.
Megjithatë, sipas diplomatit, pala iraniane beson se negociatorët amerikanë “duket se e kuptojnë qëndrimin e Iranit mbi pasurimin”.
Araqchi kishte deklaruar më herët për televizionin shtetëror iranian se “ky ishte një fillim i mirë i negociatave”.
“Ekziston një mirëkuptim për vazhdimin e bisedimeve. Koordinimi për hapat e mëtejshëm do të vendoset në kryeqytete,” tha ai.
“Nëse ky proces vazhdon, besoj se do të arrijmë një kornizë të mirë mirëkuptimi.”
Tensionet SHBA-Iran, Dauti: Britania është në situatë të vështirë