Numri i vdekjeve në Francë të lidhura me valën e të nxehtit është rritur në katër fëmijë të vegjël, ndërsa janë regjistruar edhe më shumë se 55 raste vdekjesh.
Ndërkohë, vala e nxehtësisë që ka përfshirë Evropën pritet të zhvendoset drejt lindjes, duke ekspozuar rreth 150 milionë njerëz ndaj temperaturave mbi 35°C, shkruan The Guardian, transmeton Dukagjini.
Shkencëtarët thanë se kjo është vala më e rëndë dhe më e përhapur e të nxehtit e regjistruar ndonjëherë, duke bërë që pothuajse gjysma e 850 qyteteve më të mëdha të Evropës të përballen me nivele të paprecedenta stresi nga nxehtësia.
Ata theksuan se temperaturat ekstreme janë bërë të mundura nga kriza klimatike, e shkaktuar nga djegia e lëndëve djegëse fosile.
Të premten, një spital në Marseille njoftoi se një fëmijë 18-muajsh kishte vdekur në repartin e urgjencës më herët gjatë javës, pasi ishte gjetur në një makinë në gjendje hipertermie (temperaturë jashtëzakonisht e lartë e trupit).
Një burim policor i tha gazetës Le Figaro se dyshohet që babai, i cili punon në zonë, mund ta ketë harruar djalin në makinë, në vend që ta dërgonte në çerdhe.
Më herët gjatë javës, një djalë trevjeçar në një periferi të Parisit u gjet i vdekur pasi kishte hyrë në një makinë dhe kishte mbetur i bllokuar brenda, kur ishte aktivizuar bllokimi i sigurisë për fëmijë. Në një rast tjetër, trupat e dy fëmijëve, të moshës dy dhe katër vjeç, u gjetën në makinën e familjes së tyre, të parkuar në një parking të një zone banimi.
Ministrja franceze e Sportit, Marina Ferrari, tha të premten se të paktën 55 persona janë mbytur në mbarë Francën, një rritje krahasuar me 40 rastet e raportuara më herët gjatë javës.