Prokuroria Themelore në Ferizaj ka paraqitur kërkesë në Gjykatën Themelore për caktimin e masës së paraburgimit ndaj të pandehurit E.Gj., i dyshuar për veprat penale “Mundësimi ose detyrimi në prostitucion” dhe “Ofrimi i lokaleve për prostitucion”, sipas Kodit Penal të Republikës së Kosovës.
Sipas Prokurorisë, ekziston dyshimi i bazuar se gjatë muajit qershor 2026, në rrugën “Ilir Konushevci” në Ferizaj, i dyshuari në cilësinë e menaxherit të një moteli ka ofruar lokalin e tij për ushtrimin e prostitucionit.
“Ekziston dyshimi i bazuar se i pandehuri, gjatë muajit qershor 2026, në Ferizaj, në cilësinë e menaxherit të motelit, ka ofruar lokalin për të mundësuar prostitucionin,” thuhet në kërkesën e Prokurorisë.
Po ashtu, nga Prokuroria theksohet se i dyshuari ka vepruar me dashje duke mundësuar ushtrimin e prostitucionit përmes punësimit të një personi me inicialet B.Xh., me qëllim ofrimin e shërbimeve seksuale me pagesë.
“Në bazë të provave të siguruara, ekziston dyshimi se i pandehuri ka mundësuar ushtrimin e prostitucionit përmes angazhimit të një personi tjetër për ofrimin e shërbimeve seksuale,” thuhet më tej.
Më 29 qershor 2026, pas zbatimit të masave të veçanta hetimore, i dyshuari është arrestuar nga Policia e Kosovës në flagrancë.
I pandehuri aktualisht ndodhet në masën e ndalimit 48-orësh, ndërsa Prokuroria ka kërkuar nga gjykata caktimin e masës së paraburgimit ndaj tij.