Tre persona humbën jetën dhe katër të tjerë mbetën të plagosur, përfshirë një djalë dyvjeçar, pas një sulmi me armë zjarri në festivalin e njohur të ushqimit “Bite of Seattle”, pranë Space Needle në Seattle të SHBA-së, raporton Reuters përcjell Dukagjini.
Sipas autoriteteve, dy viktima u shpallën të vdekura në vendin e ngjarjes, ndërsa një person i tretë ndërroi jetë më vonë në spital.
Mes të plagosurve janë një djalë 2-vjeçar dhe një grua 56-vjeçare, ndërsa gjendja e të mbijetuarve raportohet e stabilizuar.
Kryetarja e Bashkisë së Seattle, Katie Wilson, konfirmoi se një i dyshuar është arrestuar menjëherë pas incidentit, ndërsa policia është në kërkim të një personi të dytë që dyshohet se është përfshirë në të shtënat dhe është larguar nga vendi i ngjarjes.
Departamenti i Policisë së Seattle ka nisur një hetim të gjerë për zbardhjen e rrethanave të ngjarjes dhe u ka bërë thirrje qytetarëve të shmangin zonën, ndërsa autoritetet vazhdojnë mbledhjen e provave dhe marrjen në pyetje të dëshmitarëve.