Raportimi i një qytetari përmes aplikacionit mobil të Policisë së Kosovës ka rezultuar me identifikimin dhe ndëshkimin e një shoferi që kishte kryer tejkalim të kolonës në rrugën Prizren–Reqan.
Drejtoria Rajonale e Policisë në Prizren njoftoi se rasti ishte raportuar më 2 gusht 2026, ndërsa pas veprimeve hetimore dhe verifikimit të pamjeve, më 5 gusht është identifikuar kundërvajtësi.
“Në lidhje me raportimin në aplikacionin mobil të datës 02.08.2026, ku shihet se automjeti bën tejkalimin e kolonës në rrugën Prizren–Reqan, më datë 05.08.2026 është identifikuar kundërvajtësi dhe Njësia Rajonale e Trafikut Rrugor në Prizren i ka shqiptuar vendimin për kundërvajtje”, thuhet në njoftimin e Policisë.
Sipas Policisë, ndaj shoferit është shqiptuar gjobë prej 200 eurosh, dy pikë negative dhe masa e ndalimit të drejtimit të automjetit për një periudhë prej tre muajsh.
“Për kundërvajtjen e shkaktuar, i njëjti është gjobitur me 200 euro, dy pikë negative dhe i është ndaluar e drejta e ngasjes për tre muaj”, bëhet e ditur në njoftim.
Policia theksoi se qytetarët në mbarë vendin po vazhdojnë të bashkëpunojnë duke raportuar shkeljet e mundshme të ligjit, përfshirë kundërvajtjet në komunikacion, ndërsa u bëri thirrje të gjithë pjesëmarrësve në trafik që të respektojnë rregullat dhe të shmangin sjelljet e rrezikshme.
“Apelojmë tek të gjithë pjesëmarrësit në komunikacion që të respektojnë rregullat e trafikut, të shmangin shpejtësinë e lartë dhe sjelljet e rrezikshme, me qëllim të ruajtjes së jetës dhe sigurisë së qytetarëve”, thuhet në apelin e Policisë.