Policia e Kosovës ka realizuar një operacion policor gjatë të cilit janë sekuestruar rreth tre kilogramë substancë e dyshuar narkotike e llojit marihuanë, dy automjete dhe dy telefona celularë.
Sipas njoftimit të Policisë, operacioni është zhvilluar më 11 gusht nga Sektori Qendror për Hetimin e Narkotikëve (SQHN), pas dyshimeve se dy automjete me targa vendore po transportonin substanca narkotike nga Prishtina në drejtim të Mitrovicës.
Gjatë tentativës për ndalimin e automjeteve, të dyshuarit nuk iu janë bindur urdhrave të zyrtarëve policorë dhe, sipas Policisë, kanë goditur zyrtarët policorë në uniformë.
Për neutralizimin e rrezikut, zyrtarët policorë kanë përdorur armën e zjarrit si pajisje zyrtare.
Automjetet e dyshuara më pas janë ndaluar nga njësitë policore, ndërsa gjatë kontrollit në njërën prej tyre është gjetur dhe sekuestruar rreth tre kilogramë substancë e dyshuar narkotike e llojit marihuanë.
Në vazhdim të operacionit janë realizuar tri bastisje në lokacione të ndryshme.
Gjatë bastisjeve, si prova relevante për rastin, janë sekuestruar edhe 0.7 gramë substancë e dyshuar narkotike e llojit marihuanë, dy automjete dhe dy telefona celularë.
Për rastin është njoftuar prokurori kompetent, i cili ka urdhëruar që personat e dyshuar, pas arrestimit dhe përfundimit të procedurave të tjera ligjore, të dërgohen në mbajtje për 48 orë.