Kryetari i Lidhjes Demokratike të Kosovës (LDK), Lumir Abdixhiku, është adresuar me një video-mesazh pas vendimit të subjektit të tij politik lidhur me krizën politike në vend.
Pas mbledhjes me grupin parlamentar, LDK-ja ka vendosur të tërhiqet nga kërkesat për pozita institucionale, ndërsa ka ofruar mbështetje për zgjedhjen e një presidenti apartiak, pa qenë pjesë e qeverisjes.
Abdixhiku tha se fillimisht kishte propozuar një bashkëpunim politik me synimin për transformimin e vendit dhe kishte besuar se përfshirja e LDK-së në qeverisje do të sillte rezultate për Kosovën.
“Kam ofruar ide për transformimin e Kosovës… kam besuar se me LDK-në në qeverisje do të bëheshin punë të mira për Kosovë”, tha Abdixhiku.
Ai theksoi se LDK-ja kishte pranuar që Lëvizja Vetëvendosje të mbante postin e kryeministrit dhe kryetarit të Kuvendit, ndërsa për partinë e tij kishte kërkuar një rol në qeverisje dhe pozitën e presidentit.
“Ia kemi njohur VV-së të drejtën për të pasur kryeministrin dhe kryetarin e Kuvendit, për LDK-në kemi kërkuar një rol të denjë në qeverisje dhe pozitën e presidentit. Propozimi ynë u refuzua”, deklaroi ai.
Sipas Abdixhikut, LDK-së më pas i janë ofruar vetëm tri ministri, ndërsa VV-ja do të mbante postet kryesore të ekzekutivit.
“LDK-së iu ofruan vetëm tri ministri, ndërsa për veten mbanin gjithë ekzekutivin, kryeministrin dhe kryetarin e Kuvendit”, tha ai.
Abdixhiku kritikoi gjithashtu qasjen e Vetëvendosjes ndaj LDK-së, duke thënë se sulmet e vazhdueshme kanë dëmtuar besimin ndërmjet subjekteve politike.
“Sulmet e vazhdueshme ndaj LDK-së e cenuan besimin pa të cilin nuk mund të ndërtohet asnjë partneritet”, u shpreh Abdixhiku.
Ai bëri të ditur se, pavarësisht zhvillimeve, LDK-ja ka vendosur të mos insistojë më në pozita dhe të ofrojë mbështetje për një president apartiak, me synim të tejkalimit të krizës politike dhe funksionalizimit të institucioneve.