Autoritetet spanjolle kanë ndërmarrë një operacion emergjent për të shpëtuar eshtrat e tre mbretërve të Aragonës nga një manastir historik që rrezikohej nga zjarret.
Si masë parandaluese, eshtrat u nxorën nga manastiri San Juan de la Peña dhe u transferuan në muzeun provincial në Huesca, rreth 80 kilometra në jug të manastirit, bëri të ditur Mar Vaquero, nënkryetar i rajonit verilindor të Aragonës.
Zjarri, i cili kishte shpërthyer në fillim të javës, nisi të përparonte në drejtim të manastirit të shekullit X, duke ngritur shqetësime serioze se flakët mund të përfshinin kompleksin me vlerë të jashtëzakonshme historike.
Përballë rrezikut, autoritetet nisën një operacion për evakuimin e objekteve më të çmuara. Një ekip i njësisë ushtarake të emergjencave arriti fillimisht të hynte në manastir dhe të nxirrte veshjet ceremoniale që i përkisnin një konti të shekullit XVIII, të varrosur aty. Ekipi u detyrua më pas të tërhiqej për shkak të afrimit të flakëve.
Në një ndërhyrje të dytë, pjesëtarët e njësisë së emergjencave, të shoqëruar nga policia dhe zyrtarë të trashëgimisë kulturore, arritën të evakuonin eshtrat e tre mbretërve të parë të Aragonës, të cilët sunduan ndërmjet viteve 1035 dhe 1104.
Eshtrat u nxorën nga panteoni mbretëror brenda manastirit, ndërsa nga kompleksi u larguan edhe disa piktura me vlerë historike.
Vaquero vlerësoi guximin dhe ndërhyrjen e ekipeve të shpëtimit, të cilat operuan ndërsa zjarri vazhdonte të afrohej.
Situata u përkeqësua nga temperaturat e larta dhe erërat e forta, të cilat favorizuan përhapjen e flakëve. Zjarri ka përfshirë një sipërfaqe të madhe dhe ka detyruar autoritetet të evakuojnë banorë nga disa zona të rrezikuara.
Pavarësisht kërcënimit, manastiri San Juan de la Peña raportohet se ka mbetur i paprekur nga flakët.
Ndërkohë, autoritetet spanjolle po përballen edhe me zjarre të tjera të mëdha në pjesë të vendit, ndërsa qindra banorë janë detyruar të largohen nga shtëpitë e tyre për shkak të avancimit të flakëve.