Shkencëtarët thonë se këto drita do të ndriçonin me ngjyrë të gjelbër, në vend të së kuqes, dhe mund të integroheshin lehtësisht në dizajnin e automjeteve. Ato gjithashtu mund të instaloheshin edhe në automjetet ekzistuese me një kosto relativisht të ulët.
Shkencëtarët, të udhëhequr nga Ernst Tomasch nga Instituti për Sigurinë e Automjeteve, rikonstruktuan 200 aksidente reale trafiku të ndodhura në kryqëzimet rrugore në Austri dhe më pas i simuluan me supozimin se automjetet e përfshira ishin të pajisura me drita frenimi në pjesën e përparme.
Në varësi të kohës së reagimit të pjesëmarrësve në trafik, mund të parandaloheshin nga 7.5 deri në 17 për qind e përplasjeve. Në rreth një të katërtën e rasteve, dritat shtesë do të mundësonin uljen e shpejtësisë së përplasjes dhe, si rrjedhojë, do të zbutnin edhe pasojat e lëndimeve.
Çelësi qëndron te shkurtimi i kohës së reagimit, i cili mund të bëjë dallimin vendimtar mes një aksidenti dhe frenimit në kohë.
Megjithatë, kjo teknologji ka edhe kufizimet e saj. Sipas studimit të TU Graz, të publikuar së fundmi në një revistë shkencore për automjetet, në rreth një të tretën e aksidenteve të rikonstruktuara, dritat e frenimit në pjesën e përparme nuk do të ishin të dukshme për shkak të këndit të pafavorshëm të shikimit.
Për këtë arsye, shkencëtarët rekomandojnë që dritat e frenimit të vendosen edhe në pjesët anësore të automjetit, në mënyrë që sinjali të jetë i dukshëm nga sa më shumë drejtime. /Telegrafi
