Prokuroria Speciale dhe Policia e Kosovës kanë njoftuar se të dielën, më 16 gusht, është arrestuar në Zveçan një person me inicialet I.M., nën dyshimet për përfshirje në disa vepra penale.
Sipas komunikatës së përbashkët, arrestimi është kryer nga hetuesit e Drejtorisë për Hetimin e Krimit të Organizuar dhe Krimeve të Rënda, me urdhër të Prokurorisë Speciale, pas ndërmarrjes së një sërë veprimesh hetimore.
I.M. dyshohet për veprat penale “sulm ndaj personit zyrtar”, “pjesëmarrje në turmë që kryen vepër penale dhe huliganizëm”, “bashkim për veprimtari kundërkushtetuese” dhe “rrezikim i personave nën mbrojtje ndërkombëtare”.
Sipas Prokurorisë Speciale dhe Policisë, i dyshuari lidhet me sulmet ndaj pjesëtarëve të KFOR-it dhe Policisë së Kosovës në maj të vitit 2023.
Autoritetet kanë bërë të ditur se do të ndërmarrin veprimet e mëtejshme procedurale në përputhje me ligjin dhe standardet ndërkombëtare.