Kryeministri i Malit të Zi, Milojko Spajiq, ka deklaruar se Qeveria ka informacione operative të sigurisë për përgatitjen e një veprimtarie të koordinuar hibride, që sipas tij synon destabilizimin e vendit.
Përmes një postimi në rrjetin social X, Spajiq tha se në këto aktivitete janë të përfshirë zyrtarë të të paktën dy shteteve të rajonit, ndërsa pritet edhe mbështetja e disa aktorëve politikë dhe një pjese të mediave në Mal të Zi.
“E dimë për këto synime dhe jemi të vetëdijshëm për qëllimin e tyre. Përpjekjet për destabilizim nuk do ta ndryshojnë kursin tonë dhe as nuk do ta ndalin rrugën evropiane të Malit të Zi, e cila është më e madhe se interesat ditore të cilësdo strukturë politike”, ka deklaruar Spajiq.
Deklarata e kryeministrit malazez vjen në prag të shqyrtimit të hapjes së një faze të re në procesin e integrimit evropian të vendit.
Më 1 shtator, grupi punues i Këshillit të Bashkimit Evropian për zgjerimin pritet të shqyrtojë draftet e qëndrimeve për mbylljen e katër kapitujve negociues me Malin e Zi.
Bëhet fjalë për kapitullin 14, që lidhet me politikën e transportit, kapitullin 12 për sigurinë ushqimore, kapitullin 18 për statistikat dhe kapitullin 19 për politikën sociale dhe punësimin.