Ambasadori amerikan në Izrael, Mike Huckabee, ka folur përsëri kundër dhunës së kolonëve izraelitë në Bregun Perëndimor të pushtuar, duke e quajtur sjelljen e tyre “akt terrori”.
Ambasadori amerikan të shtunën iu referua kolonëve si “terroristë”.
Këtë fjalë zyrtarët amerikanë zakonisht e përdorin duke iu referuar militantëve palestinezë. Huckabee gjatë së shtunës është takuar me palestinezo-amerikanë, përfshirë të afërm të qytetarëve amerikanë të vrarë nga kolonët izraelitë, në një qytet palestinez në Bregun Perëndimor që ka qenë shënjestër e sulmeve të kolonëve.
Vizita e tij ndodhi në kohën kur dhuna e kolonëve dhe ajo që perceptohet gjerësisht si mosveprim i qeverisë izraelite, po kritikohet gjithnjë e më shumë ndërkombëtarisht, përfshirë edhe nga aleatët më të ngushtë si Shtetet e Bashkuara të Amerikës.
Qeveria izraelite ka dënuar dhunën e kolonëve, megjithëse autorët rrallë arrestohen dhe madje edhe më rrallë ndiqen penalisht. Rreth 3 milionë palestinezë jetojnë në Bregun Perëndimor, me dhjetëra mijëra që vlerësohet të jenë shtetas amerikanë.
Palestinezët në Bregun Perëndimor janë përballur me rritje të dhunës së kolonëve, ndërsa liritë e tyre janë kufizuar gjithnjë e më shumë nën pushtimin ushtarak që kur koalicioni i kryeministrit Benjamin Netanyahu, erdhi në pushtet në fund të vitit 2022.