Deputetja e Partisë Demokratike të Kosovës, Blerta Deliu-Kodra, i ka cilësuar shqetësuese rezultatet e Kosovës në testin PISA 2025, duke kritikuar qeverisjen e Albin Kurtit për gjendjen në sistemin arsimor.
Deliu-Kodra ka rikujtuar një deklaratë të mëhershme të kryeministrit Albin Kurti, i cili, sipas saj, kishte thënë se i duheshin dy mandate për ta rregulluar arsimin.
“Po thirrem në një deklaratë të Albin Kurtit, dikur kur sapo publikoheshin listat e rezultateve në PISA, deklarohej se i duheshin dy mandate për ta rregulluar arsimin. Ne sot e shohim që janë gjashtë vite të pushtetit të Albin Kurtit dhe shohim që janë rezultate shqetësuese”, ka deklaruar Deliu-Kodra në Five të TV Dukagjinit
Sipas saj, rezultatet e publikuara duhet të shërbejnë si alarm për të gjithë skenën politike, pavarësisht nëse janë në pozitë apo opozitë.
“Janë alarm për pozitë e opozitë. Dhe në këtë kohë në vend që të jetë preokupim i joni arsimi, shëndetësia, mirëqenia, ne flasim për emra të përveç a do të jetë zonja Haxhiu kryetare e Kuvendit, kush do te jetë presidenti…”, është shprehur ajo.
Në PISA 2025, nxënësit 15-vjeçarë nga Kosova kanë marrë mesatarisht 357 pikë në shkencë, 340 pikë në lexim dhe 350 pikë në matematikë. Krahasuar me vitin 2022, rezultati në shkencë ka mbetur i njëjtë, ndërsa në lexim ka rënë nga 342 në 340 pikë. Në matematikë është shënuar rënie prej pesë pikësh.
Vetëm rreth 21 për qind e nxënësve në Kosovë kanë arritur të paktën Nivelin 2 në shkencë, ndërsa në matematikë kjo përqindje është rreth 15 për qind dhe në lexim rreth 16 për qind.
Kosova vazhdon të mbetet nën mesataren e Organizatës për Bashkëpunim dhe Zhvillim Ekonomik.