Kompania Rajonale e Ujësjellësit “Prishtina” me anë të një postimi në Facebook ka njoftuar se nga 25 korriku 2022 do të fillojnë me aplikimin e shkyçjeve nga sistemi i rrjetit të ujësjellësit, për ato biznese që kanë të papaguar një faturë të ujit e lart.
“Borxhi total i sektorit të bizneseve të vogla e të mëdha është mbi 7 milionë euro (mbi 5 milionë euro bizneset e vogla dhe mbi 2 milionë euro bizneset e mëdha)”, thuhet në postimin e Kompanisë Rajonale të Ujësjellësit.
KRU “Prishtina” ka shtuar se për të ofruar furnizim stabil me ujë kërkohet angazhim maksimal dhe ka kosto të lartë në trajtimin e ujit dhe mirëmbajtjen e rrjetit të ujësjellësit dhe kanalizimit në vazhdimësi.
“Keni kohë 6 ditë të paguani të gjitha faturat e papaguara për shërbime të ujit dhe kanalizimit. Masa e shkyçjes dhe më vonë rikyçjes do të shoqërohet edhe me shpenzime shtesë, të cilat rrjedhin nga tarifat e parapara nga Autoriteti Rregullator për Shërbimet e Ujit dhe Urdhëresës Tarifore të Shërbimeve ARRU/UTSH-14/04/2022″.
Komisioni Rajonal i Ujësjellësit “Prishtina”, në rast të ndërhyrjeve të paautorizuar në rrjetin e ujësjellësit pas aplikimit të shkyçjes, do të iniciojë kallëzime penale për secilin konsumator të kategorisë së bizneseve, në rast se ndërmarrin veprime të tilla të paligjshme.
