Të enjten, presidenti i Shqipërisë, Ilir Meta do të qëndrojë për vizitë zyrtare në Kosovë.
“Nga 21 deri më 23 korrik, Ilir Meta së bashku me një delegacion shoqërues do të jetë në Kosovë”, ka bërë të ditur Policia e Kosovës, e cila ka vijuar se gjatë kësaj vizite do të kujdeset për ofrimin e sigurisë dhe mirëmbajtjen e rendit e qetësisë publike, gjatë kohës së lëvizjes së eskortës dhe qëndrimit të delegacionit shtetëror në Kosovë.
Po ashtu, në kohën e ardhjes më 21 korrik, për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme, në intervale të shkurtra kohore të qarkullimit të trafikut në disa segmente rrugore ku pritet të kalojë eskorta.
Po ashtu, edhe në ditën e kthimit, më 23 korrik, sipas agjendës zyrtare do të ndërmerren veprimet e njëjta policore të lëvizjes së eskortës, në rrugët të cilat përdoren për qarkullim të eskortës.
Policia e Kosovës ka kërkuar mirëkuptim të plotë nga ana e qytetarëve dhe pjesëmarrësve në trafik, në mënyrë që të mundësohet qarkullimi dhe riorientimi i trafikut në rrugë alternative në lokacionet ku pritet të kalojë eskorta.