Me fillim nga e premtja deri më datë 10 gusht qarkullimi i autobusëve të Trafikut Urban, vetëm e linjës 4 do të qarkullojë deri në orën 02:00 pas mesnate.
Këtë e ka bërë të ditur nënkryetari i Komunës së Prishtinës, Alban Zogaj në një postim në rrjetin social Facebook, ku ka thënë se nga kjo zgjatje e qarkullimit të autobusëve do të kenë mundësinë të kthehen të gjithë ata që janë në Festivalin Sunny Hill.
“Sonte, nesër dhe pasnesër, Linja 4 e Trafikut Urban do të qarkullojë deri në orën 02:00. Të gjithë që ktheheni nga Sunny Hill Festival do të keni mundësi ta shfrytëzoni autobusin”, ka shkruar Zogaj në rrjetin social Facebook, trasnmeton Dukagjini.
Kjo zgjatje i qarkullimit erdhi një ditë pasi filloi Festivali Sunny Hill, kur edhe u pa që një fluks i madh i qytetarëve ishte në autobusët e linjës 4, të cilët dërgojnë udhëtarët drejt parkut të Gërmisë.
“Policia janë në krejt qytetin, në Gërmi ka numra të shtuar të Policisë dhe kjo pjesë e qytetit është më e ngarkuara”, ka thënë Zogaj gjersa ka shtuar se në këtë festival pritet të jenë prezentë mbi 25 mijë persona.
Përveç pjesëtarëve të rendit, do të ketë edhe sigurim privat i cili do të jetë nën menaxhimin e “SunnyHill”.
Përveç kësaj, Zogaj për Dukagjinin ka thënë se pritet që autobusët të merren nga linjat e tjera apo të vihen në shërbim për transportin e qytetarëve.
Ndër të tjera, nënkryetari Zogaj ka shtuar se Komuna e Prishtinës ka ndërmarrë masat që pritet të realizohen pas përfundimit të festivalit, masa që përfshijnë mirëmbajtjen e parkut.
Po ashtu, është bërë e ditur se dy autoambulanca dhe ekipi mjekësor janë marrë nga Qendrat e Mjekësisë Familjare që të jenë në shërbim të pjesëmarrësve të festivalit “SunnyHill”.