Policia e Shqipërisë ka njoftuar se ka identifikuar të dyshuarin për zjarrvënie në fshatin Biçukas të Divjakës.
Sipas Policisë së Shqipërisë si pasojë e zjarrvënies janë djegur 100 hektarë tokë me bimësi të ndryshme dhe ullinj.
Në njoftim thuhet se, Shërbimet e Komisariatit të Policisë Divjakë dhe të Forcës së Posaçme “Shqiponjat” në DVP Fier, me marrjen e njoftimit për zjarrin e rënë në tokat bujqësore dhe në disa sipërfaqe toke me ullinj, në pronësi të banorëve të fshatit Biçukas, ata kanë thënë se menjëherë kanë dalë në vendngjarje për t’iu ndihmuar banorëve të zonës.
Sipas tyre, zjarri kishte dalë nga kontrolli për shkak të erës duke u përhapur me shpejtësi në sipërfaqe të mëdha toke, pasi në shumë drejtime zjarrfikësit nuk intervenonin dot për shkak të terrenit të vështirë.
“Në vijim të veprimeve hetimore, nga specialistët për Hetimin e Krimeve në Komisariatin e Policisë Divjakë u bë arrestimi në flagrancë i shtetasit K. T., 60 vjeç, banues në Biçukas, Divjakë, në fshatin Biçukas”, thuhet në komunikatën e tyre.
Tutje ata kanë treguar se çfarë ishte dëmtuar nga zjarrvënia, “janë djegur qindra rrënjë ullinj, një sipërfaqe e madhe toke me shkurre dhe pemë frutore, si edhe janë rrezikuar banesat e banorëve të këtyre fshatrave”.
Policia e Fierit ka bërë thirrje që të gjithë qytetarët të kenë kujdes, që në asnjë rast të mos shkaktojnë zjarrvënie, pasi do të përballen me ligjin.
Gjithashtu, ka bërë thirrje për qytetarët që ta denoncojnë në numrin 112 dhe Komisariatin Dixhital, çdo rast të zjarrvënës apo të paligjshmërisë në tërësi, duke iu garantuar anonimatin dhe reagim të shpejtë e të paanshëm nga strukturat policore.