Kryetari i Partisë Socialiste të Serbisë, Ivica Daçiq, është deklaruar për mbështetjen e tij ndaj presidentit serb, Aleksandër Vuçiq, lidhur me qëndrimet që ai i shprehu gjatë takimit me serbët e Kosovës, të dielën e 21 gushtit.
Daçiq u ka bërë thirrje të gjitha palëve në Serbi që të mos shkatërrojnë unitetin dhe stabilitetin politik.
“Nuk ka çështje më të rëndësishme se shteti dhe populli, prandaj qëndrimet e sotme kanë rëndësi historike në luftën për paqe dhe kompromis dhe mbrojtjen e popullit tonë në Kosovë. Nuk ka çështje më të rëndësishme në Serbi se këto ditë”, ka thënë Daçiq, shkruan Tanjug.
Ndryshe, presidenti i Serbisë, Aleksandër Vuçiq, ka thënë se Kosova ka dy synime e që janë shfuqizimi i shtetit serb në Kosovë dhe ‘dëbimi i serbëve’.
Pas takimit me përfaqësuesit e serbëve të Kosovës, Vuçiq ka thënë se Beogradi kishte propozuar targa me status neutral “KS” mirëpo, kryeministri i Kosovës, Albin Kurti nuk është pajtuar dhe ka kërkuar që ato të jenë “RKS”.
“Kuptimi i gjithçkaje është se çfarëdo që ne pranojmë apo nuk pranojmë, ata refuzojnë gjithçka”, ka thënë Vuçiq.
Ai, gjithashtu, ka thënë se mesazhi i tij për Kosovën është se Serbia do të mbrojë popullin e saj në Kosovë kinse nga persekutimet, duke theksuar se nuk do të ketë refugjatë.
Në takim janë të ftuar të gjithë përfaqësuesit politikë dhe institucionalë të serbëve nga Kosova, liderët e Listës Serbe, të gjithë kryetarët serbë të komunave, kryetarët e rretheve dhe drejtorët e spitaleve.