Mbretëria e Bashkuar do të vendosë një ngrirje të plotë të aseteve në bankën më të madhe të Rusisë dhe do t’i japë fund të gjitha importeve të naftës dhe qymyrit deri në fund të vitit, ka bërë të ditur sekretarja e jashtme, Liz Truss.
Sanksionet do të vendosen edhe për tetë oligarkë të tjerë, duke përfshirë Moshe Kantor, aksionerin më të madh të kompanisë së plehrave “Acron” dhe “Andrey Guryev”, themeluesin e një kompanie tjetër kryesore të plehrave, të cilin Britania e Madhe e përshkroi si bashkëpunëtor të ngushtë të Vladimir Putin.
Të tjerë që janë vendosur nën sanksione përfshijnë Sergey Sergeyevich Ivanov, president i prodhuesit më të madh të diamanteve në botë, Alrosa, dhe Leonid Mikhelson, themeluesi dhe CEO i prodhuesit kryesor rus të gazit natyror Novatek, me një vlerë neto prej 18 miliardë paund.
Njoftimi erdhi së bashku me masa të ngjashme nga aleatët perëndimorë, përfshirë BE-në, e cila gjithashtu ka ndaluar importet e qymyrit rus. SHBA njoftoi gjithashtu se po vendoste sanksione kundër Sberbank, bankës më të madhe ruse, së bashku me MB.
Mbretëria e Bashkuar do të vendosë ngrirje të aktiveve ndaj Sberbank dhe Bankës së Kreditit të Moskës dhe do të vendosë një ndalim të plotë për të gjitha investimet e reja të jashtme në Rusi, me vlerë 11 miliardë paund në 2020.
Deri në fund të vitit 2022, Mbretëria e Bashkuar do t’i jepte fund të gjithë varësisë nga qymyri dhe nafta ruse, thuhej në njoftimin e sanksioneve, me një zotim për t’i dhënë fund importeve të gazit “sa më shpejt të jetë e mundur pas kësaj”.
Ndalimet e eksportit do të vendosen gjithashtu për pajisjet kryesore të rafinimit të naftës, si dhe ndalimin e importeve të produkteve të hekurit dhe çelikut.