Ndonëse i bënë pritje të ngrohtë, i dyti i Qeverisë së Kosovës gjatë vizitës në Luginë të Preshevës kishte një “vërejtje të vogël”. Ujin prodhim të Serbisë tha se nuk e përdorin, prandaj u largua nga tavolina. Ujë nga Kosova nuk kishte sjellë, por para nxënësve në Preshevë, zëvendëskryeministri Besnik Bislimi prezantoi libra shqip e të shtypura në Kosovë. Mbi katër mijë filloristë në Luginë të Preshevës do të mësojnë të shkruajnë e të lexojnë me to.
Arsimi ishte tema më e përmendur në vizitën e delegacionit të Kosovës në Luginë. Megjithatë njerëzit që i shoqëruan gjatë vizitës kryesisht ishin nga politika. I vetmi deputet shqiptar në Kuvendin e Serbisë, ato që i kërkon vazhdimisht, thotë se ia përcolli mysafirëve nga Kosova.
“Qeveria në marrëveshjen finale eventuale që do të duhet të arrihet me Serbinë çështjen e shqiptarëev të Luginës së Preshevës patjetër ta ketë pjesë”, ishte porosia e deputetit, Shaip Kamberi.
Pos Kamberit delegacionin nga Kosova, i shoqëroi edhe kryetari i Këshillit Kombëtar Shqiptar, Ragmi Mustafi. Po ashtu përfaqësuesit e Republikës së Kosovës u pritën edhe nga kryetari i Bujanocit, Nagip Arifi. Në takime mungoi vetëm një përfaqësues politik, kryetari i Preshevës, Shqiprim Arifi.
“Për mua të gjithë liderët e Preshevës por edhe të Bujanocit dhe Medvegjës janë të zgjedhur të popullit dhe përfaqësues të tyre. Pra janë të njëjtë për muar”, ishte përgjigja e Bislimit në pyetjen se për çka mungoi Arifi.
Arifi nuk pati rastin ta dëgjoj, por me secilin lider që u takua, Bislimi thotë se i përcolli një porosi.
“Për ne Lugina është pjesë qëndrore e marrëveshjes meqë insistimi ynë është që të drejtat të cilat Serbia i kërkon për qytetarët serbë në Kosovë duhet fillimisht t’i sigurojë për qytetarët shqiptarë në Luginë”, ishte mesazhi që ai përcolli tek liderët e Luginës.
Për dallim prej tij, në fund të takimeve ministrja prap foli për arsimin. “E kemi kuptuar me shqetësim se nxënësit e shkollave të mesme vazhdojnë të ballafaqohen me sfidat sa i përket mungesës së teksteve. Por gjithsesi bashkëpunimi jonë do të vazhdoj edhe më tutje”, deklaroi ajo.
Ashtu siç i priti, kryetari i Këshillit Kombëtar mysafirët edhe i përcolli por me një porosi.
“Për ne është e rëndësishme që të vendoset parimi i reciprocitetit. Ky parim për shqiptarët e Luginës së Preshevës nënkupton barazi dhe simetri me rapot me të drejtat e komunitetit serb në Kosovë. Dhe nuk ka asnjë arsye që ne të mos trajtohemi në të njëtin nivel”, u shpreh Mustafi.
E Shqiprim Arifi i vetmi qe nuk ishte në takime, për RTV Dukagjini nuk i tregoi arsyet për mungesën e tij. Nga Arifi nuk kanë munguar kritikuat për Qeverinë “Kurti”, ai madje as nuk kishte ardhur në takimin e fundit me liderët e Luginës në Prishtinë.