Kryetari i Partisë Socialdemokrate, Dardan Molliqaj, e ka kritikuar Qeverinë e Kosovës, e cila sipas tij, nuk është duke e menaxhuar krizën ekonomike në mënyrën e duhur.
Sipas të parit të PSD-së, rritja e pagave duhet të jetë e domosdoshme dhe kjo duhet të bëhet me Ligjin e Pagave, i cili sipas tij, po zvarritet.
“Rritja e pagave është domosdoshmëri – siç është edhe Ligji i Pagave, i cili po zvarritet -, sepse qytetarët kanë nevojë për zgjidhje dhe jo për lëmoshë. Rritja ekonomike apo bonuset edhe mund të duken bukur në letër, por pa masa të duhura mirëqenieje nuk sjellin e as nuk e kompensojnë mirëqenien që po e gëlltit inflacioni çdo muaj”, ka shkruar Molliqaj në Facebook.
Në fund, Molliqaj ka thënë se “Sado kokëfortë të jetë qeveria, kërkesat e drejta të punëtorëve janë më të forta”, dhe se pagat do të rriten “për shkak të rezistencës”, së punëtorëve.