Zëvendëskryeministrja njëherësh ministre e Punëve të Jashtme dhe Diasporës e Republikës së Kosovës, Donika Gërvalla-Schwarz, të shtunën e 10 shtatorit ka pritur në takim zëvendëskryeministrin e Republikës së Malit të Zi, Rashko Konjeviq dhe ka kërkuar ndihmën e Malit të Zi lidhur me aplikimin e Kosovës në Kartën e Adriatikut.
“Ministrja e Punëve të Jashtme dhe Diasporës, Donika Gërvalla-Schwarz ka njoftuar ministrin e Mbrojtjes së Republikës së Malit të Zi, Rashko Konjeviq rreth aspiratave euro-atlantike të Republikës së Kosovës dhe ka kërkuar ndihmën e Malit të Zi lidhur me aplikimin e Republikës së Kosovës në programin “Partneriteti për Paqe” (PfP) dhe Kartën e Adriatikut”, thuhet në njoftimin e ministrisë.
Ministrja Gërvalla-Schwarz në takim ka potencuar rëndësinë e pjesëmarrjes së Republikës së Kosovës në të gjitha bashkëpunimet rajonale që ndërlidhen me siguri.
Gërvalla ka falënderuar ministrin e Mbrojtjes të Malit të Zi, Rashko Konjeviq për bashkëpunimin me Republikën e Kosovës, gjë që sipas saj ka ndikim të shumanshëm në të mirën e sigurisë, stabilitetit dhe demokracisë mes dy vendeve mike.
Në vazhdën e takimit Gërvalla ka njoftuar ministrin Konjeviq për bisedimet mes Republikës së Kosovës dhe Serbisë.