Kryetari i Kuvendit të Kosovës, Glauk Konjufca, ka përkujtuar sulmet e 11 shtatorit të vitit 2001 në New York, Washington DC dhe Pensilvani.
Përmes një postimi në Facebook, Konjufca ka thënë se sulmi i 11 shatorit nuk ishte vetëm një sulm ndaj popullit amerikan.
“Mizoria që tronditi botën nuk ishte goditje vetëm kundër popullit amerikan dhe ShBA-së, por edhe sulm brutal mbi vlerat e lirisë, demokracisë, mirëqenies, civilizimit dhe paqes globale”, ka shkruar Konjufca.
Ai ka thënë se Republika e Kosovës solidarizohet me Shtetet e Bashkuara të Amerikës.
“Edhe sot, në 21-vjetorin e kujtimit të njërës ndër ditët më të tmerrshme në historinë e botës, populli dhe shteti ynë, Republika e Kosovës, me mendje e zemër janë pranë dhimbjes së familjeve të viktimave, popullit mik amerikan dhe përkrah shpëtimtarit e aleatit tonë më të fuqishëm, Shteteve të Bashkuara të Amerikës”, ka shkruar Konjufca.
Ndërkaq, edhe presidentja e Kosovës, Vjosa Osmani së bashku me kryeministrin e Kosovës, Albin Kurti dhe zëvendësamabasadoren e Shteteve të Bashkuara të Amerikës, Alyson Grunder, kanë bërë homazhe te memoriali “Kosova kujton”, në nder të viktimave të 11 shtatorit të vitit 2001, në SHBA.
Pjesë e homazheve ishte edhe Ministrja e Punëve të Jashtme dhe Diasporës, Donika Gërvalla-Schwarz.
Të dielën e 11 shtatorit janë shënuar 21 vjet nga sulmi i 19 individëve, përkatësisht, 15 nga Arabia Saudite, dy nga Emiratet e Bashkuara Arabe, një nga Egjipti dhe një nga Libani.
Katër aeroplanë kryen sulme duke goditur Kullat Binjake në Nju Jork, Pentagonin në Uashington dhe një avion u rrëzua në Pensilvani. Nga ky sulm mbetën të vdekur afër 3 mijë persona.