Anëtari i Partisë Socialdemokrate, Dren Kukaj, e ka kritikuar Lëvizjen Vetëvendosje, duke thënë se nuk po merr asnjë veprim për t’i kundërshtuar veprimet e Gjykatës Speciale.
Ai ka thënë se në momentin e arrestimit të ish-krerëve të UÇK-së, nga LVV-ja janë gëzuar.
Sipas tij, partisë në pushtet është duke i pëlqyer që Specialja i ka “eliminuar”, kundërshtarët politikë të tyre.
“Nuk është kjo partia që dikur e kundërshtonte Gjykatën Speciale, është partia që sot është e heshtur ndaj veprimeve të saj. Ne e kemi parë në momentin e arrestimit, ata as nuk kanë mundur ta mbajnë veten në gëzime. Kemi parë statuse të Kurtit dhe nuk shohim asnjë veprim kundër kësaj gjykate nga ana e qeverisë. Gjykata Speciale i konvenon Lëvizjes Vetëvendosje. Atyre po u pëlqen ideja që Gjykata Speciale i ka hequr disa kundërshtarë politikë”, ka thënë ai.
Kukaj ka theksuar se Gjykata Speciale është politike, dhe se këtë do ta kundërshtojnë edhe përmes protestës në Komunën e Gjilanit.
“Konsiderojmë që kjo gjykatë është politike andaj konsiderojmë që kundërshtimin si PSD ta shënojmë me një protestë në Gjilan në orën 10, ashtu që ardhja e saj mos të kalojë në qetësi. Kundërshtimet ndaj saj janë të qëndrueshme dhe ato duhet të intensifikohen në qëndrimin politik. Kundërshtimi duhet të bëhet në rrafshin politik, mirëpo konsiderojmë që sa më e përfshirë të jetë shoqëria në kundërshtimi e kësaj gjykate aq më e shëndetshme do të jete edhe shoqëria jonë”, ka thënë ai.
Tutje, ai është shprehur se një gjykatë e tillë, siç është Gjykata Speciale, ka për qëllim vetëm njollosjen e luftës së UÇK-së.
Rasti i Gjykatës Speciale, sipas tij, është rast i paprecedentë, pasi nuk ka ndodhur asnjëherë në asnjë vend të botës.