Selvije Gashi e cila jeton në Gjermani, nuk po arrin tash e sa ditë që të pajiset me dokumentet të cilat i duhen, në Komunën e Prishtinës.
“Kemi pritë shumë për kushte më të mira por si duket edhe pas 20 viteve nuk ka asgjë, kam pritë dje krejt ditën prej një komune në komunën tjetër, prej një zyre në zyrën tjetër asgjë nuk kam përfunduar, asnjë dokument, zyrat janë të mbyllura, shërbimi është nën nivelin e duhur, nuk e di prej nga vjen kjo”, ka thënë Gashi për RTV Dukagjinin.
Përveç sporteleve që nuk po punojnë për shkak të grevës, pranë Komunës së Prishtinës, gjatë të mërkurës nuk ka funksionuar as E-Kioska, e cila shërben që dokumentet të nxjerrën në mënyrë elektronike.
E shkak i grevës dikush ka mbetur tash e 12 ditë pa i nxjerrë dokumentet.
“Që 12 ditë për çdo ditë vij, krejt janë mbyll kjo është tmerr nuk e sheh askund në botë, këta rrogën e marrin prej popullit që na i bëjnë shërbimet”, ka deklaruar një qytetar nga Prishtina.
E greva sipas Komunës së Prishtinës ndikoi edhe në mosfunksionimin e e-kiosqeve. Kjo pasi zyrtaret kanë refuzuar të punojnë dhe si rezultat i kësaj e-kiosqet kanë mbetur pa u furnizuar me certifikata.
Por ky problem, është rregulluar sipas drejtorit të Administratës në kryeqytet, Bersant Beka.
“Pas takimit qe kemi pasur me Sindikatën kemi hasur në mirëkuptim dhe jemi pajtuar që të furnizohet e-kiosku në mënyrë që mos të pësojnë qytetarët, gjithashtu jemi pajtuar që rasteve emergjente t’u ofrohet shërbimi në sportele”, ka deklaruar Beka.
Përndryshe janë bërë 21 ditë që kur ka nisur greva e punëtorëve të sektorit publik në Kosovë.