Zëdhënësi i presidencës çeke të BE-së ka bërë të ditur se raporti i Komisionit Evropian për situatën aktuale me vizat, pritet të prezantohet në takimin e Grupit Punues për viza më 13 tetor të këtij viti, me ç’rast Presidenca çeke do të bëjë çfarë është e mundur ta fusë në agjendën e ministrave sa më parë.
Sipas zëdhënësit, transmeton Gazeta Express, vendimi për vizat i cili mund të zgjasë për disa muaj, mund të merret në nivel të ministrave, pavarësisht sesi rrjedhin gjërat në takimet joformale të shefave të shteteve të BE-së. Njërin prej takimeve ata pritet ta mbajnë më 7 tetor.
Si bazë e nisjes së debatit mbi miratimin e liberilizimit të vizave në KE do të shërbejë Raporti i Komisionit Evropian, raport ky i cili pritet të prezantohet më 13 tetor në organin përgatitor të Këshillit Evropian, i njohur ndryshe sikurse “Grupi Punues për Viza”.
Ndër të tjera, Zëdhënësi i Presidencës çeke, Václav Smolka, ka konfirmuar se në mesin e shteteve të Bashimit Evropian ka gatishmëri që Kosovës t’i hiqet regjimi i vizave për zonën Schengen.
“Liberalizimi i vizave për Kosovën ndodhet shumë lart në agjendën e Presidencës Çeke. Aktualisht, Komisioni Evropian është duke përgatitur një raport për situatën aktuale, i cili do të shërbejë si bazë për të nisur një debat për miratimin e liberalizimit të vizave në Këshillin e BE-së. Ky raport pritet të prezantohet në takimin e Grupit Punues për Viza më 13 tetor 2022”, ka thënë ai
Zëdhënësi i presidencës çeke, Vaclav Smolka, që njëherit ushtron edhe funksionin e zëdhënësit të kryeministrit çek, Petr Fiala, ka thënë se Çekia do të bëjë të gjitha përpjekjet që ta fusë në agjendë të ministrave të BE-së sa më parë.
Ai ka thënë se presidenca çeke do të bëjë të gjitha përpjekjet për ta sjellë sa më shpejt këtë çështje në nivelin e ministrave, ndonëse përkrahja apo miratimi nga Këshilli Evropian nuk është një parakusht në këtë çështje. Sipas tij, një progres i tillë varet edhe nga situata politike në rajon, gjë me të cilin ai kishte nënkuptuar përparimet në dialogun Kosovë-Serbi.
“Progresi do të varet edhe nga situata e përgjithshme politike në rajon, prandaj Presidenca mbështet plotësisht përpjekjet për një trajektore pozitive në dialogun Beograd-Prishtinë”, tha ai.
Ndërkaq, lidhur me takimin e 7 tetorit, Smolka ka thënë se nuk ka agjendë zyrtare dhe se pritet që takimi i kryesuar nga presidenti i Këshillit Evropian, Charles Michel, të pasqyrojë sfidat më të urgjente me të cilat përballet BE-ja, siç janë lufta në Ukrainë, siguria energjetike dhe ekonomia.
Deri tani, Komisioni Evropian ka rekomanduar dy herë që Kosovës t’i liberalizohen vizat në raportet e tij më 2016 dhe 2018. Mirëpo, Kosova mbetet i vetmi shtet në Ballkanin Perëndimor i cili nuk ka liberalizim vizash me BE-në.