Korporata Energjetike e Kosovës (KEK), ka njoftuar se të dielën, njësia A3 është ndalur për shkak të “veprimit të mbrojtjes në ndërpresin e gjeneratorit”.
KEK-u ka bërë të ditur se ekipet e tyre bashkë me atë të KOSTT-it, janë duke tentuar ta identifikojnë burimin, i cili e ka shkaktuar këtë ndalje.
“Në këtë drejtim ekipet profesionale të KEK-ut dhe KOSTT-it janë duke punuar në identifikimin e burimit që ka shkaktuar veprimin e kësaj mbrojtjeje, dhe për të mundësuar rikthimin e sigurt të njësisë në punë në kohë optimale”, thuhet në njoftimin e KEK-ut.
Në njoftim thuhet se KEK-u ka marrë të gjitha masat për mbulimin e mungesave si pasojë e ndaljes së njësisë A3, në mënyrë që të mos ketë reduktime të energjisë elektrike.
“Lidhur me këtë, KEK ka ndërmarrë të gjitha masat e nevojshme për mbulimin e mungesave të paraqitura si pasojë e daljes së njësisë A3, në mënyrë që kjo ndalje të mos reflektojë në mungesë të energjisë për qytetarët e vendit”, thuhet në njoftim.
Sipas njoftimit, KEK-u ka bërë të ditur se në ditët në vijim do të njoftojë për veprimet e tij.