Skenat e dhunshme nga huliganët në veri të Kosovës tashmë janë bërë pothuajse të përditshme që nga fundi i muajit maj.
E, ulja në një tavolinë me aleatët dhe gjetja e një zgjidhje të përbashkët me ta, është veprim që duhet të bëhet sipas presidentes së vendit, Vjosa Osmani.
Ky reagim i saj që erdhi nga Berlini po konsiderohet i vonshëm, ndonëse shumë i nevojshëm.
“Deklarata e presidentes është shumë e vonuar. Ajo deri tani është sillur si vasale e Kurtit dhe jo si simbol i unitetit të popullit. Tashmë konflikti i Kurtit me faktorët ndërkombëtar duket të jetë I pakthyeshëm dhe me pasoja të rënda prandaj mirë që presidentja ka filluar të distancohet në mënyrë që të shpëtoj atë që mund të shpëtohet”, ka thënë profesori, Milazim Krasniqi.
Për të deeskaluar situatën kanë ardhur disa kërkesa nga Bashkimi Evropian dhe nga Shtetet e Bashkuara të Amerikës, por që ato nuk përputhen me qëndrimet e Qeverisë.
E, sipas njohësve të çështjeve politike, pranimi i tyre është zgjidhja e vetme.
“Ne si Kosovë duket se i kemi qëndrimet edhe nga BE-ja edhe nga SHBA-ja që i kemi të vendosura edhe disa kushte dhe ato kushte duket që nuk janë të negociueshme dhe janë si qëllim për të vazhduar bashkëpunimin. Fillimisht të zbatohen nga Kosova ato kushte dhe të hapet rruga e mbështetjes aty ku ka ngelur”, ka thënë analisti, Visar Xani.
Situatë më e rëndë në veri të Kosovës u krijua të premten ku pos që u tentua të sulmohet Ministri i Pushtetit Lokal, Elbert Krasniqi, cak i personave serb të maskuar ishin edhe gazetarët e kameramanët kosovarë, ku nëntë prej tyre pësuan lëndime.