Aleanca për Ardhmërinë e Kosovës (AAK) do të marrë pjesë në diskutimin e organizuar nga Ambasada e SHBA-së, lidhur me Asociacionin e Komunave me shumicë Serbe.
Këtë e ka konfirmuar për Radio Televizionin Dukagjini, drejtori për Informim në AAK, Lulëzim Blaka.
“Një përfaqësues i Aleancës do të marrë pjesë në takimin e organizuar nga Ambasada amerikane”, ka thënë Blaka.
Diskutimi në objektin e Ambasadës së SHBA-së në Prishtinë, mbahet më 31 janar, një ditë pasi fondacioni gjerman “Friedrich Ebert Stiftung” pritet të publikojë propozimin për statutin e Asociacionit.
Në kohën kur presioni për themelimin e Asociacionit të Komunave me Shumicë Serbe po shtohet ditë e më shumë, tashmë një draft i këtij mekanizmi është hartuar si propozim. Një gjë të tillë, e ka bërë Fondacioni për social demokraci Friedrich-Ebert-Stiftung që vepron edhe në Kosovë. Këtë draft Radio Televizioni Dukagjini e ka siguruar nga një përfaqësi diplomatike në Prishtinë. Dokumenti përmban 18 nene, ndërsa që në nenin e parë theksohet se Asociacioni është një entitet legal i themeluar në bazë të Kushtetutës dhe sistemit ligjor të Republikës së Kosovës.
Në 18 nene është vendosur baza e statutit të Asociacionit të Komunave me Shumicë Serbe, draft ky i propozuar nga Fondacioni për social – demokraci FES. Ky dokument që ende nuk ka dalë në publik është siguruar nga Radio Televizioni Dukagjini, nga një përfaqësi diplomatike në Prishtinë. Në fillim të këtij dokumentit të propozuar nga FES thuhet se ky mekanizëm themelohet në bazë të Ligjit për Ratifikimin e Marrëveshjes së Parë të Parimeve për Normalizimi i Marrëdhënieve në mes Republikës së Kosovës dhe Republikës së Serbisë.