Deputeti i pavarur, Haki Abazi ka thënë se shumë persona i kanë raportuar se pagesat nga platforma “Superpuna” nuk janë kryer për disa muaj me radhë.
Ai në një postim në Facebook, ka thënë se kjo platformë nuk është asgjë veçse punë e kompanive dhe agjensioneve profesionale.
“Ka një numër të rinjëve që po më shkruajnë se pagesat nga platforma Superpuna nuk janë kryer për disa muaj me radhë. Natyrisht që kjo superpuna si platformë është një hiç gjë, kjo është punë e kompanive dhe agjensioneve profesionale dhe Jo punë e qeverisë por në këtë moment duhet të fokusohemi dhe kërkojmë pagesën për të punësuarit”, ka shkruar Abazi në Facebook.
Ndryshe, në shkurt të këtij viti, Qeveria e Kosovës ka njoftuar se do të vazhdojë platforma “Superpuna” e cila ka nisur një vit më parë.
Përmes kësaj platforme, ekzekutivi në Prishtinë subvencionon punëdhënësin duke paguar pagën e punëtorit për gjashtë muaj, në vlerë prej 264 eurosh. Punëdhënësi, pastaj, ka të drejtë ta shtojë vlerën e pagës për punëtorin e angazhuar.
Sipas platformës “Superpuna”, pas periudhës gjashtëmujore, punëdhënësi mund të mbajë në punë punëtorin duke nënshkruar kontratë të re, por edhe mund ta shkarkojë.