Kryetari i Lidhjes Demokratike të Kosovës (LDK), Lumir Abdixhiku, ka reaguar përmes një postimi në Facebook lidhur me Samitin e Komunitetit Politik Evropian që po mbahet në Tiranë, ku marrin pjesë 47 liderë evropianë.
Në postimin e tij, Abdixhiku vlerëson rolin e Shqipërisë si epiqendër e re rajonale dhe uron vendin fqinj për zhvillimin e tij, por në të njëjtën kohë shpreh shqetësim të thellë për gjendjen në të cilën ndodhet Kosova.
Sipas tij, ndërsa Evropa po ndërton të ardhmen në Tiranë, Kosova vazhdon të mbetet e izoluar, nën masa dhe sanksione të vendosura nga Bashkimi Evropian, pa institucione funksionale dhe pa ndjenjën e urgjencës për të adresuar problemet e brendshme.
“Evropa sot po zbarkon në Tiranë.
E gjitha. Me plot 47 liderët e saj.
Në Tiranën që tashmë, si epiqendër e re rajonale, është bërë shtëpi nga ku po gdhendet e ardhmja e vet kontinentit. Në këtë të ardhme, pa dyshim, po i bëhet vendi dhe vendit të shqipeve.
Kosova, ndërsa, vazhdon të mbetet nën masa e sanksione. Vazhdon të mbetet dhe pa institucione. Mbi të gjitha, vazhdon të mbetet pa ndjenjën e urgjencës për kohën. Nuk ka urgjencë mu tha!
Të tjerat, si zhvillimi, mirëqenia, si progresi shoqëror janë të pakapshme për ata që kanë kapur të ardhmen e vendit tash e sa kohë. Sepse për ta shijimi i jetës së pushtetit, është vet qëllimi. Të tjerat presin.
Sepse kemi rënë. Po vazhdojmë rënien. Të tjerët po vazhdojnë ecjen. Të tjerët po ndërtojnë. Të tjerët po bëhen pjesë e së ardhmes së bukur evropiane që tani u shfaqet vetëm pak vite larg.
Rizgjimi kombëtar ndonjëherë kërkon kohë.
Por sot, ky rizgjim Kosove, kërkon urgjencë.
Kjo urgjencë nuk vjen nga ata që nuk e njohin nevojën. Vjen nga populli i Kosovës që rizgjohet!
Shqipërisë, vetëm përgëzime”, ka shkruar Abdixhiku në Facebook.